چهرگانی بیر میللته بدل دیر!!!؟؟؟ - ماهني زنگانلي

http://www.baybak.com/Baybak/?p=3832

میللت اورتا چاغلارادک ،باتی اؤلکه لرینده ده بو گو نکو آنلامینی ایفاده ائتمزمیش. میللت بیر شخیص یادا شخیص لرده ن عیبارت ایمیش.بؤیله جه باتیتاریخینده ده میللت شخیص لرده ن قورتولماغا موجادیله لر وئرمیش.1793 نجو میلادی ایلدن بری میللت گئت گئده یئرینی آلماغا باشلامیش. اصلینده ییرمینجی یوزایلده کی بوتون اینقیلاب لار، شخیص لر اوستونده قورولموش حاکیمییت لری قالدیرماق و یئرینه میللت حاکیمییتینی قورماق دوشونجه سی ایله دوزنلنمیش دیر.فرانسه اینقبلابیندان، روسیانین 1917 نجی اینقیلابینا و1898 نجی کوبا حرکاتیندان 1949 نجو چین اینقیلابینا قده ر خالق لار شخیص لرده ن قورتولوب میللت اولماغا دوغرو، یولا باشلامیش لار و طبیعی کی بیر سوره جین ایچینده ده همن میللت چتین دوروم لارلا قارشیلاشمیش دیر.آمما زامان ایچری سینده دیرچلمه و اؤزلرینه یئنی تانیم لار (تعریف لر) وئرمه یی دونیا سوییه سینده باجارمیش لاردیر.باتی اؤلکه لری نین چوخ قیساجا میللت اولما پروسه سینه گؤز دولاندیراندان سونرا، اورتا دوغو و اؤزللیک جه تاریخیمیزدکی حرکاتیمیزا باخدیقیمیزدا هله ده گئری ده اولدوغوموز آنلاشیلیر.تأسسوف لر اولسون کی تاریخ دن درس آلمایاراق هله ده گئری لرده دالیب قالان، آذربایجان میللت چی لری بوتون موجادیله لرینده ده توپلومو نظره آلمادان، یئنه ده هر زامان کی کیمی شخیص لره ، میللت ده ن آرتیق ده یر وئرمیش.تاریخ بویویجا بیز اؤزوموزه اؤزه ل بیر اؤزگورلوک فابریکاسی قورماغا چالیشدیق و هر زامان دا بو فابریکادان چیخان مال لار یالنیز اؤزگورلوییوموزون اوغروندا یوخ، باشقالارینی قوروماغا یادا کؤلگه سی آلتیندا یاشاماغا چالیشدی.آذربایجان میللی حرکاتیندا هر زامان اؤزگورلوک بینالاری میزین بینؤوره سینی میللت اوستونده یوخ شخیص لر اوستونده تیکدیک.دئمک بو 10-15 ایلین ایچینده یئنی دن آلوولانان کؤز یئنه ده کئچمیش دکی رولونو ایفا ائتمه یه باشلامیش. یئنه ده ایچیمیزدن بیرینی ، سانکی سؤزو وحی میش و سون سؤزو نه قده ر یانلیش اولسادا سؤزدور،سئچدیک. او ایزین وئرمه ده ن دینیب دانیشماغی، اینسان کیمی یاشامی، اینسان کیمی داورانیشی اؤزوموزه و أن اؤنملی سی میللتیمیزه یاساق ائتدیک، آدینی دا قویدوق اؤزگورلوک موجادیله سی!!!!.توپلومون ایسته یینی دیققته آلمادان شخیص لری میللت آدینا هر زامان دیکلتمه یه چالیشدیق ، آجی اولسادا، گرچک .و منجه بو اسکی تئزلرین ایزلری، بو گونکو حرکتیمیزده هله ده گؤرونمه کده دیر .بئله گئده رایسه، منجه بو خالق هئچ زامان میللت اولماق تجروبه سینی بیر داها اله کئچیره بیلمه یه جک دیر .بؤلگه نین بو آغیر پولیتیک دورومونو نظرده آلدیغیمیزدا دوروموموزون نه قده ر آغیر اولدوغونو آنلاماق راحت دیر.شخیص لرده دالیب قالان سایغی لی آرخاداشلارا اؤزللیک جه " [1] گاموح چو" لارا بیر دوست کیمی اؤنری: منجه مییللتین اوغرونا، بیر داها تکرار نه ایسته دی ینیزی درین ده ن دوشونمه نیز لازیم. بو قده ر ایسراریزین نه ده ن اولدوغو گرچک ده ن کیمسه یه آنلاشیلماییر!؟،مادام کی میللتی دوشونورسونوز!!!!!!!.میللت ساده جه سیزده ن عیبارت دئییل،بیزده میللت ده نیک !!دوست لار: اونوتمایالیم کی بیز گونئی آذربایجاندا موجادیله وئرریک. او گونئی آذربایجاندا کی، ایرانا مدرنیزمی،چاغداشلیغی هدیه ائتمیش دیر.آمما بیز سانکی عربیستاندا ،کوردیستاندا و یا خود ترکمنیستاندا موجادیله وئریریک کیمی تام بیر قبیله توپلومونون سیاسی لری کیمی رفتار ائدیریک.منجه بو سیاسی بیر موجادیله اولماقدان چیخمیش. سیز آرتیق رنگ لر و آدلار اوچون موجادیله وئریرسینیز.- [1] گاموح چو دوست لار: میللت اولما غی تجربه ائتمک استه ییریک ایسه بعضی شئی لرده ن و بعضی عیناد لاردان واز گئچمه لیییکa